उत्तर भारतात थंडीचा प्रकोप, काश्मीरमध्ये पारा उणे 4 अंशावर

नवी दिल्ली

संपूर्ण उत्तर भारतात सध्या कडाक्याची थंडी जाणवत आहे. देशातील बहुतेक भागांमध्ये पारा सतत खाली उतरत आहे. एका बाजूला डोंगराळ राज्यांमध्ये बर्फवृष्टीचा जोर सुरू आहे, तर दुसऱ्या बाजूला मैदानी प्रदेशातील तापमानात लक्षणीय घट दिसून येत आहे. या पार्श्वभूमीवर, भारतीय हवामान विभागाने (IMD) आज म्हणजेच सोमवारपासून देशाच्या अनेक भागांत थंडीची लाट (शीतलहर) येण्याचा इशारा दिला आहे. विभागाने दिलेल्या माहितीनुसार, उत्तर भारतातील १० हून अधिक शहरांमध्ये आजपासून दाट धुक्याची सुरुवात होणार आहे, त्यामुळे लोकांनी सावधगिरी बाळगावी, असे आवाहन करण्यात आले आहे.

दिल्ली-एनसीआरमधील हवामानाची स्थिती

हवामान विभागाच्या अंदाजानुसार, राष्ट्रीय राजधानी दिल्लीतील रहिवाशांना या आठवड्यात थंडीच्या लाटेचा सामना करावा लागणार आहे. वाढत्या प्रदूषणासोबतच हवामान विभागाने दिल्लीकरांसाठी ही नवी चिंता वाढवली आहे. IMD नुसार, सोमवारी दिल्लीतील किमान तापमान 6 अंशापर्यंत खाली येऊ शकते आणि दिल्ली तसेच आसपासच्या संलग्न प्रदेशांतील तापमानात आणखी घट होण्याची शक्यता आहे.उत्तर प्रदेशातील हवामानउत्तर प्रदेशातील जवळपास सर्व जिल्ह्यांमध्ये तापमान खाली आले आहे. हवामान विभागाने १०, ११ आणि १२ डिसेंबर रोजी यूपीमध्ये दाट धुक्याचा इशारा दिला आहे, ज्यामुळे तापमानात सातत्याने घट नोंदवली जाईल. 

पश्चिम उत्तर प्रदेशात आज तापमानात वेगाने घसरण होऊ शकते. दुसरीकडे, पूर्व उत्तर प्रदेशातील अनेक भागांत दिवसा सूर्यप्रकाशामुळे हवामान आल्हाददायक राहील, परंतु सकाळ आणि संध्याकाळच्या वेळी थंडीचा कडाका जाणवेल.

बिहारमधील थंडी

सध्या बिहारच्या सर्व जिल्ह्यांमध्ये कडाक्याची थंडी आहे. अनेक शहरांमध्ये सकाळ होताच दाट धुके पसरलेले असते. हवामान विभागाने येत्या काही दिवसांत तापमानात आणखी घट होण्याची शक्यता वर्तवली आहे.आज राजस्थानमधील हवामान कसे राहील?

IMD च्या अंदाजानुसार, राजस्थानच्या काही भागांत आज आकाश अंशतः ढगाळ राहू शकते. त्याचबरोबर किमान तापमानात दोन अंश सेल्सिअसपर्यंत घट होण्याची शक्यता आहे. एका पश्चिमी विक्षोभामुळे (Western Disturbance) काही ठिकाणी हलका पाऊस किंवा रिमझिम होण्याची शक्यता विभागानं वर्तवली आहे.

दक्षिण भारतातील राज्यांत पावसाचा इशारा

एकीकडे उत्तर भारतात कडाक्याची थंडी सुरू असताना, दुसरीकडे दक्षिण भारतातील अनेक राज्यांमध्ये पावसाची शक्यता आहे. तामिळनाडूच्या प्रादेशिक हवामान विभागाने सांगितले की, राज्याच्या अनेक भागांत १२ डिसेंबरपर्यंत हलका ते मध्यम स्वरूपाचा पाऊस पडण्याची शक्यता आहे. ईशान्य मान्सून दक्षिणेकडील जिल्ह्यांमध्ये अधिक सक्रिय झाल्यामुळे मोठ्या भागांत हलका ते मध्यम पाऊस दिसू शकतो. 

कानपूर, प्रयागराज, टुंडला, चंदीगड, दिल्ली, नैनिताल, अमृतसर आणि शिमला यासह उत्तर भारतातील १० शहरांमध्ये आजपासून दाट धुक्याची सुरुवात होण्याची शक्यता हवामान विभागाने वर्तवली आहे.