इलेक्ट्रिक वाहनांसाठी टोल माफीचा मोठा निर्णय! ८ दिवसांत अंमलबजावणी

मुंबई

इलेक्ट्रिक वाहन वापरकर्त्यांसाठी आनंदाची बातमी! महाराष्ट्र राज्यातील इलेक्ट्रिक वाहन चालकांसाठी एक महत्त्वाची आणि आनंदाची बातमी आहे. विधानसभा अध्यक्ष राहुल नार्वेकर यांनी बुधवारी सभागृहात निर्देश दिले की, राज्यातील सर्व इलेक्ट्रिक वाहनांना (ई-वाहन) दिलेली टोलमाफी येत्या आठ दिवसांत लागू करावी. यासोबतच, टोलमाफी लागू झाल्यानंतरही ज्या वाहनचालकांकडून टोल वसूल करण्यात आला आहे, ती रक्कम त्यांना परत करण्याची कार्यवाही त्वरित सुरू करावी, असे स्पष्ट निर्देश त्यांनी प्रश्नोत्तर सत्रादरम्यान संबंधित विषयावर चर्चा करताना दिले. आमदार शंकर जगताप यांनी उपस्थित केलेल्या मूळ प्रश्नावर बोलताना, विधानसभा अध्यक्ष नार्वेकर यांनी सभागृहाला आश्वस्त केले की, सरकारने ई-वाहनांसाठी टोलमाफी जाहीर केली असल्यामुळे आता त्यातून माघार घेणे शक्य नाही. त्यामुळे, संपूर्ण राज्यातील सर्व टोल नाक्यांना आठ दिवसांच्या आत टोल न घेण्याचे स्पष्ट आदेश जारी करावे लागतील. वाढत्या इलेक्ट्रिक वाहनांच्या वापराचा विचार करून, राज्यभरातील चार्जिंग स्टेशन्सची संख्या वाढवावी, तसेच सध्या अस्तित्वात असलेल्या स्टेशन्सची क्षमताही वाढवावी, जेणेकरून ई-वाहन चालकांना पुरेशी सुविधा मिळेल, असेही त्यांनी पुढे नमूद केले. तत्पूर्वी, या विषयावर उत्तर देताना, प्रभारी मंत्री दादा भुसे यांनी कबूल केले की टोलमाफी लागू करण्यात तांत्रिक कारणांमुळे तीन महिन्यांचा विलंब झाला आहे. प्रणालीतील आवश्यक सुधारणा लवकरच केल्या जातील, असे आश्वासन त्यांनी दिले. महाराष्ट्र सरकारने इलेक्ट्रिक वाहनांना टोल न लावण्याचे धोरण निश्चित केले असले तरी, टोल नाक्यांवर अद्यापही टोल वसूल केला जात असल्याच्या तक्रारी होत्या. मात्र, विधानसभेतील या चर्चेनंतर, राज्यातील ई-वाहन वापरकर्त्यांना टोलमाफीचा थेट लाभ लवकरच मिळू शकेल, अशी अपेक्षा व्यक्त केली जात आहे.