'वंदे मातरम'च्या १५० व्या वर्षपूर्तीनिमित्त लोकसभेत वादळी चर्चा: प्रियंका गांधींनी सरकारला केले थेट प्रश्न

नवी दिल्ली

लोकसभेत सोमवारी ‘वंदे मातरम’ गीताच्या १५० व्या वर्धापन दिनानिमित्त झालेल्या चर्चेदरम्यान काँग्रेस नेत्या प्रियंका गांधी यांनी सत्ताधाऱ्यांना थेट प्रश्न विचारत मोठे विधान केले. “हे गाणे १५० वर्षांपासून देशाच्या आत्म्याचा भाग आहे आणि गेल्या ७५ वर्षांपासून ते लोकांच्या हृदयात आहे. मग आज त्यावर चर्चा का केली जात आहे?” असा सवाल त्यांनी उपस्थित केला.

प्रियंका गांधी पुढे म्हणाल्या, “चला, आपण एकदा नेहरू आणि घराणेशाहीच्या मुद्द्यावर चर्चा करूया. त्यानंतर, महागाई आणि बेरोजगारीसह देशासमोरील इतर महत्त्वाच्या मुद्द्यांवर सविस्तर बोलूया.” प्रियंका गांधी यांच्या या विधानामुळे सभागृहात सत्ताधारी आणि विरोधक या दोन्ही पक्षांमध्ये जोरदार वादविवाद झाला.

सभापतींनी "चला तथ्यांशिवाय चर्चा करूया," असे म्हटल्यावर प्रियंका गांधींनी सडेतोड उत्तर दिले. त्या म्हणाल्या, "इतक्या वर्षांपासून हे लोक तथ्यांशिवाय आमच्यावर हल्ला करत आहेत. सरकार देशाबद्दलचे सत्य लपवू इच्छिते आणि म्हणूनच ते 'वंदे मातरम'वर चर्चा करू इच्छिते."

ऐतिहासिक सत्य स्पष्ट करताना प्रियंका गांधींनी सांगितले की, “१७ ऑक्टोबरच्या पत्राला उत्तर देताना नेहरूंनी २० ऑक्टोबरच्या पत्रात लिहिले की, ‘मी २५ ऑक्टोबर रोजी कोलकाता येथे येऊन टागोरांना भेटण्याचा निर्णय घेतला आहे.’ आणि २८ ऑक्टोबर रोजी काँग्रेसने 'वंदे मातरम'ला राष्ट्रगीत म्हणून घोषित केले. या कार्यकारिणीच्या बैठकीत सर्व महापुरुष उपस्थित होते आणि या प्रस्तावावर सर्वजण आनंदी होते व त्यांनी एकमत दर्शवले होते.” यावेळी प्रियंका गांधींनी खासदार कंगना राणावत यांच्यावरही टीका केली.

या चर्चेला सुरुवात होण्यापूर्वी पंतप्रधान नरेंद्र मोदी यांनी काँग्रेसवर आरोप केले होते. ते म्हणाले होते की, "काँग्रेसने 'वंदे मातरम'चे तुकडे केले. जवाहरलाल नेहरू जिनांसमोर नतमस्तक झाले. स्वातंत्र्यापासून 'वंदे मातरम' हे प्रेरणेचे स्रोत होते, मग गेल्या दशकात त्याच्याशी अन्याय का केला गेला?"