संजयनगरातील मुळे शाळेसमोर कचऱ्याचा ढीग; विद्यार्थ्यांच्या आरोग्याचा प्रश्न ऐरणीवर

श्रीरामपूर प्रतिनिधी

श्रीरामपूर शहरातील संजयनगर प्रभागातील डी. एम. मुळे प्राथमिक व माध्यमिक शाळेसमोरील मैदानात मोठ्या प्रमाणावर कचऱ्याचा ढीग साचल्याने विद्यार्थ्यांच्या आरोग्याचा गंभीर प्रश्न निर्माण झाला आहे. शाळेसमोरील मोकळ्या जागेत प्लास्टिक, घरगुती कचरा, सेंद्रिय कचरा, कागद, अन्नाचा उरलेला कचरा व इतर घाण टाकली जात असल्याने संपूर्ण परिसर अस्वच्छ झाला असून दुर्गंधी पसरली आहे.

विशेष म्हणजे याच मैदानावर दररोज शेकडो विद्यार्थी खेळतात, व्यायाम करतात तसेच विविध शालेय, सांस्कृतिक आणि क्रीडा उपक्रम पार पडतात. कचऱ्याच्या ढिगाजवळ विद्यार्थ्यांचा वावर असल्याने डास, माशा, भटकी जनावरे व भटके कुत्रे यांचा त्रास वाढला असून संसर्गजन्य आजारांचा धोका निर्माण झाला आहे.

अनेक विद्यार्थी घरून जेवणाचे डबे घेऊन येतात. दुपारच्या सुट्टीत ते शाळेच्या मैदानात किंवा परिसरात बसून जेवण करतात. मात्र शेजारीच साचलेल्या कचऱ्यामुळे निर्माण होणारे डास, माशा व इतर कीटक विद्यार्थ्यांच्या अन्नावर बसत असल्याने त्यांच्या आरोग्याला गंभीर धोका निर्माण झाला आहे. दूषित वातावरणात जेवण करावे लागत असल्याने विद्यार्थ्यांमध्ये पोटाचे विकार, उलट्या, जुलाब तसेच इतर संसर्गजन्य आजार होण्याची शक्यता वाढली आहे. त्यामुळे पालकांमध्ये भीतीचे वातावरण निर्माण झाले असून विद्यार्थ्यांच्या आरोग्याशी सुरू असलेल्या या खेळाकडे तातडीने लक्ष देण्याची मागणी होत आहे.

या परिसरात नागरिकांची व वाहनांची मोठ्या प्रमाणावर वर्दळ असल्याने रस्त्याने ये-जा करणारे अनेक नागरिकही याच ठिकाणी कचरा टाकत असल्याचे चित्र दिसून येत आहे. कचरा पेटीची व्यवस्था नसल्याने तसेच नियमित देखरेख होत नसल्यामुळे ही जागा हळूहळू अनधिकृत कचरा टाकण्याचे ठिकाण बनली आहे. त्यामुळे दिवसेंदिवस कचऱ्याचे प्रमाण वाढत असून दुर्गंधी, डास, माशा आणि अस्वच्छतेचा त्रास अधिक तीव्र होत आहे. शाळेच्या प्रवेशद्वारासमोरील ही परिस्थिती विद्यार्थी, पालक आणि परिसरातील नागरिकांसाठी गंभीर चिंतेचा विषय ठरली आहे.

नागरिकांच्या म्हणण्यानुसार, या परिसरात कचरा टाकू नये यासाठी कोणतीही प्रभावी व्यवस्था नसून, येथे कायमस्वरूपी कचरा पेटीची सुविधा उपलब्ध करून देणे अत्यंत आवश्यक आहे. कचरा पेटी नसल्यामुळे अनेकजण उघड्यावर कचरा टाकत असल्याने परिसर दिवसेंदिवस अस्वच्छ होत आहे. तसेच परिसरात नियमित स्वच्छता, कचरा संकलन, निर्जंतुकीकरण व डास प्रतिबंधक फवारणी होत नसल्याचीही तक्रार नागरिकांनी केली आहे.

स्थानिक नागरिकांनी अनेकदा या समस्येकडे लक्ष वेधूनही स्थानिक लोकप्रतिनिधी व संबंधित प्रशासनाकडून अपेक्षित दखल घेतली जात नसल्याची खंत व्यक्त केली आहे. शाळेसारख्या संवेदनशील परिसरातही स्वच्छतेबाबत उदासीनता दिसून येत असल्याने नागरिकांनी तीव्र नाराजी व्यक्त केली आहे.

पत्रकार इम्रान सरदार शेख यांनी या गंभीर समस्येकडे लक्ष वेधले असून, लवकरच श्रीरामपूर नगरपरिषदेचे मुख्याधिकारी यांना लेखी निवेदन देऊन शाळेसमोरील कचरा तातडीने हटविणे, नियमित स्वच्छता करणे, या ठिकाणी कायमस्वरूपी कचरा पेटी बसविणे, नियमित निर्जंतुकीकरण व फवारणी करणे तसेच सार्वजनिक ठिकाणी कचरा टाकणाऱ्यांवर दंडात्मक कारवाई करावी, अशी मागणी करण्यात येणार असल्याची माहिती दिली आहे.

नागरिकांनीही नगरपरिषद प्रशासनाने या गंभीर प्रश्नाची तातडीने दखल घेऊन विद्यार्थ्यांना स्वच्छ, सुरक्षित आणि निरोगी वातावरण उपलब्ध करून द्यावे, अशी जोरदार मागणी केली आहे.