वसई
महाराष्ट्रातील वसईमध्ये एका पित्याने आपल्या मुलाच्या शाळेच्या पहिल्या दिवसाला आयुष्यभर लक्षात राहील असा अनोखा आणि लक्झरी टच दिला आहे. शिक्षक असलेल्या नवीत भोईर यांनी आपल्या चार वर्षीय मुलाला शाळेत सोडण्यासाठी Rolls Royce व पाच इतर कारांचा ताफा तयार केला आणि शाही पद्धतीने शाळेपर्यंत पोहोचले.
ही घटना १२ जून रोजी वसईतील विद्या विकासिनी शाळेत घडली. नवीत भोईर हे वसईजवळील खिंडीपाडा भागातील जिल्हा परिषद शाळेत शिक्षक म्हणून कार्यरत आहेत. आपल्या मुलाचा शाळेचा पहिला दिवस खास करण्यासाठी त्यांनी हा अनोखा उपक्रम राबवला.
भोईर यांनी Rolls Royce कार भाड्याने घेतली व त्यासोबत पाच इतर कारांचाही ताफा तयार केला. सर्व कार फुलांनी सजवण्यात आल्या होत्या. ढोल-ताशांच्या गजरात आणि जल्लोषाच्या वातावरणात त्यांनी शाळेपर्यंत रॅली काढली. या शानदार आगमनाचा व्हिडीओ सध्या सोशल मीडियावर प्रचंड व्हायरल होत आहे.
या अनोख्या उपक्रमावर लोकांमध्ये वेगवेगळ्या प्रतिक्रिया उमटत आहेत. काहींनी या क्षणाला गौरवशाली व संस्मरणीय असे संबोधले आहे, तर काहींनी याला दिखावा मानत टीकाही केली आहे. अनेक पालक म्हणाले की, जर त्यांचेही मुले अशा प्रकारच्या मागण्या करू लागली, तर त्यांची आर्थिक स्थिती ढासळेल.
तरीही एका शिक्षक पित्याने आपल्या मुलाच्या आयुष्यातील महत्वाच्या दिवसाला खास बनवण्यासाठी केलेली ही कल्पकता समाजात चर्चेचा विषय ठरली आहे.
0 टिप्पण्या