मुंबई
मुंबई पोलिसांनी गेल्या एका महिन्यात विविध भागांतून चोरीस गेलेले तब्बल १९४६ मोबाईल फोन हस्तगत केले आहेत. हे फोन डीसीपी झोन ३, डीसीपी झोन ४ आणि डीसीपी झोन ५ अंतर्गत जप्त करण्यात आले आहेत. या मोबाईल फोन्सची एकूण किंमत सुमारे ३ कोटी २२ लाख रुपये इतकी आहे.
मध्य प्रादेशिक विभागाच्या अंतर्गत येणाऱ्या तिन्ही पोलीस झोनमधील अधिकाऱ्यांनी सीईआयआर (CEIR) पोर्टलच्या माध्यमातून तांत्रिक मदत घेऊन, सायबर आणि गुन्हे शाखेच्या सहाय्याने ही मोठी कारवाई केली. वरिष्ठ अधिकाऱ्यांच्या मार्गदर्शनाखाली पोलीस पथकांनी अथक परिश्रमाने हे काम पूर्ण केले.
या भागातून झाले फोन जप्त
पोलिसांनी दिलेल्या माहितीनुसार, हे १९४६ मोबाईल फोन विविध भागांतून जप्त करण्यात आले आहेत, ज्यात ताडदेव (६२), नागपाडा (५०), अग्रीपाडा (६२), भायखळा (६१), वरळी (९९), दादर (१३८), शिवाजी पार्क (९९), माहिम (८८), सांताक्रूझ (९०), धारावी (९१), कुलाबा (९०), वांद्रे (६४) या क्षेत्रांतील मोबाईलचा समावेश आहे.
३ कोटी २२ लाख ४६ हजार रुपयांचा ऐवज
जप्त करण्यात आलेल्या मोबाईल फोन्सची एकूण किंमत अंदाजे ३ कोटी २२ लाख ४६ हजार रुपये इतकी आहे. याव्यतिरिक्त, चोरी झालेल्या मोबाईलसह जप्त करण्यात आलेल्या चांदी आणि सोन्याच्या चेनची किंमत २९ लाख ७६ हजार रुपये असल्याचे सांगण्यात आले आहे.
मालकांना परत करणार पोलीस
जप्त केलेले सर्व फोन आणि मौल्यवान वस्तू संबंधित पोलीस ठाण्यांमार्फत त्यांच्या मूळ मालकांना सोपविण्यात येतील. पोलीस आयुक्तालयाच्या अधिकाऱ्यांनी सांगितले की, हे यश पोलिसांच्या सीईआयआर पोर्टलच्या माध्यमातून संघटितपणे आणि तांत्रिक पद्धतीने केलेल्या कामाचा परिणाम आहे. त्यांनी नागरिकांनाही आवाहन केले आहे की, मोबाईल चोरीची घटना घडताच तात्काळ एफआयआर (FIR) नोंदवावा आणि सीईआयआर पोर्टलवर तक्रार दाखल करावी, जेणेकरून वस्तू लवकरात लवकर परत मिळवता येतील.
0 टिप्पण्या