होळी आणि रमजानपूर्वी मोठी कारवाई: कानपूरमध्ये ५० लाखांचे मुदतबाह्य खजूर जप्त

कानपूर

होळी आणि रमजान यांसारख्या मोठ्या सणांच्या पार्श्वभूमीवर अन्न सुरक्षा विभागाने कानपूरमध्ये मोठी कारवाई केली आहे. फजलगंज भागातील रजनीश ट्रेडर्सवर टाकलेल्या छाप्यात तब्बल १० हजार किलो मुदतबाह्य (Expired) खजूर जप्त करण्यात आले असून, त्यांची किंमत सुमारे ५० लाख रुपये आहे. धक्कादायक बाब म्हणजे, २०२२-२३ मध्येच मुदत संपलेल्या या खजुरांवर नवीन स्टिकर्स लावून ते बाजारात विकण्याचा डाव होता. हे खजूर खाल्ल्याने आरोग्याला गंभीर धोका निर्माण होऊ शकला असता. विभागाने या खजुरांसह इतर खाद्यपदार्थांचे ९ नमुने तपासणीसाठी प्रयोगशाळेत पाठवले असून अहवालानंतर दोषींवर कठोर कारवाई केली जाणार आहे.

या मोहिमेदरम्यान केवळ खजूरच नव्हे, तर इतर भेसळयुक्त पदार्थांवरही कारवाई करण्यात आली. फजलगंज परिसरातून ६७५ किलो भेसळयुक्त खवा जप्त करून नष्ट करण्यात आला, तसेच मछरिया नौबस्ता भागातून सुमारे दोन लाख रुपये किमतीची भेसळयुक्त सुपारी पकडून ती नष्ट केली गेली. सणासुदीच्या काळात मिठाई, सुका मेवा आणि खव्याची मागणी वाढत असल्याने नफाखोर लोकांच्या आरोग्याशी खेळत असल्याचे समोर आले आहे. अन्न सुरक्षा आयुक्तांच्या निर्देशानुसार ही विशेष मोहीम संपूर्ण शहरभर राबवली जात असून, नागरिकांनी कोणतीही वस्तू खरेदी करताना तिची एक्स्पायरी डेट तपासून घ्यावी, असे आवाहन प्रशासनाने केले आहे.