नागपूर
नागपूरच्या नंदनवन परिसरातील व्यंकटेश नगरमध्ये मन सुन्न करणारी एक घटना उघडकीस आली आहे, जिथे एका ५२ वर्षीय जिल्हा परिषद शिक्षिका आईने आपल्या २९ वर्षीय इंजिनीअर मुलीसह राहत्या घरी गळफास लावून आत्महत्या केली. संगीता ढबाले आणि त्यांची मुलगी आकांक्षा ढबाले अशी मृतांची नावे असून, त्यांच्या पतीच्या निधनानंतर संगीता यांना अनुकंपा तत्त्वावर नोकरी मिळाली होती. १ मे २०२६ रोजी घडलेल्या या घटनेमुळे संपूर्ण परिसरात हळहळ व्यक्त होत आहे. पोलिसांनी घटनास्थळावरून एक सुसाईड नोट हस्तगत केली आहे, ज्यामध्ये त्यांनी कोणालाही जबाबदार न धरता स्वतःच्या इच्छेने हे पाऊल उचलत असल्याचे नमूद केले आहे. मात्र, इतक्या सुशिक्षित मायलेकींनी टोकाचा निर्णय नेमका कोणत्या कारणामुळे घेतला, याचे गूढ अद्याप कायम आहे. नंदनवन पोलिसांनी सध्या आकस्मिक मृत्यूची नोंद केली असून या प्रकरणाचा सखोल तपास सुरू केला आहे.
0 टिप्पण्या