NEET पेपर लीकच्या धक्क्याने विद्यार्थिनीची आत्महत्या; सुसाइड नोटमध्ये मांडली व्यथा

नागपूर

NEET परीक्षेत झालेला घोटाळा आणि पेपर लीकच्या काळ्या सावलीने देशातील आणखी एका गुणवंत विद्यार्थ्याचे भविष्य हिरावून घेतले आहे. नागपुरात राहून NEET ची तयारी करणाऱ्या, मूळच्या मध्य प्रदेशातील मऊगंज येथील आकांक्षा चतुर्वेदी या विद्यार्थिनीने गळफास लावून आत्महत्या केली. आकांक्षाला परीक्षेत यश मिळण्याचा पूर्ण विश्वास होता, पण पेपर लीकच्या बातमीने ती इतकी खचली की तिने आपले जीवन संपवण्याचा टोकाचा निर्णय घेतला.

वडील करायचे आचारी म्हणून काम

आकांक्षाचा गुन्हा फक्त एवढाच होता की ती एका गरीब शेतकऱ्याची मुलगी होती. तिचे वडील तिला डॉक्टर बनवण्याचे स्वप्न उराशी बाळगून नागपुरात आचारी (कुक) म्हणून काम करत होते. तिचा पेपर खूप छान गेला होता, पण पेपर लीकची बातमी येताच यंत्रणेच्या या भ्रष्टाचाराने तिला नैराश्याच्या गर्तेत ढकलले. तिने तिच्या सुसाइड नोटमध्ये जे लिहिले आहे, ते देशातील परीक्षा पद्धतीवर आणि प्रशासनावर एक जोरदार चपराक आहे.

'फिजिक्स वाला'मधून करत होती NEET ची तयारी

नागपुरात राहून 'फिजिक्स वाला' या संस्थेतून NEET ची तयारी करणारी आकांक्षा चतुर्वेदी आता या जगात नाही. २० मे २०२६ रोजी आकांक्षाने तिच्याच खोलीत पंख्याला गळफास लावून आपली जीवनयात्रा संपवली. मूळचे मऊगंज जिल्ह्यातील मगनिया गावचे असलेले हे गरीब कुटुंब काही काळापासून नागपुरात राहत होते. वडील कृष्णकुमार चौबे हे पेशाने शेतकरी आहेत, पण मुलांच्या चांगल्या भविष्यासाठी ते नागपुरात स्वयंपाकाचे काम करत होते.

पालकांनी काय सांगितले?

पालकांच्या म्हणण्यानुसार, NEET चा पेपर देऊन आल्यावर आकांक्षा खूप आनंदी होती. या वेळी आपली निवड नक्की होणार आणि आपण डॉक्टर बनणार, असा विश्वास तिला होता. मात्र, NEET पेपर लीक झाल्याची बातमी देशासमोर येताच आकांक्षाला मोठा धक्का बसला आणि ती तीव्र नैराश्यात गेली. तिने जेवण-खाण सोडले आणि शेवटी मृत्यूचा मार्ग निवडला. आकांक्षाने मागे ठेवलेल्या सुसाइड नोटने परीक्षा पद्धतीतील भ्रष्टाचार पूर्णपणे उघडा पाडला आहे.

वडिलांनी किसान क्रेडिट कार्डवरून घेतले होते कर्ज

मुलीच्या शिक्षणासाठी या गरीब कुटुंबाने किसान क्रेडिट कार्ड (KCC) द्वारे ३ लाख रुपयांचे कर्ज घेतले होते, तसेच नातेवाईकांकडूनही पैसे उसने घेतले होते. या धक्कादायक घटनेनंतर आता राजकीय वर्तुळातूनही सरकारला घेरण्याची तयारी सुरू झाली आहे. युवा काँग्रेसचे प्रदेशाध्यक्ष यश घनघोरिया यांनी पीडित कुटुंबाची भेट घेऊन विरोधी पक्षनेते उमंग सिंगार यांच्याशी फोनवर त्यांचे बोलणे करून दिले. या दुःखद घटनेनंतर राजकारण कमालीचे तापले असून, NEET विद्यार्थिनीच्या आत्महत्येवरून लोकसभेतील विरोधी पक्षनेते राहुल गांधी यांनीही ट्विट करत सरकारवर निशाणा साधला आहे.

NSUI नेत्यांकडून कर्ज फेडण्याचे आश्वासन

NSUI चे राष्ट्रीय अध्यक्ष विनोद जाखड, माजी आमदार विपीन वानखेडे आणि प्रदेशाध्यक्ष आशुतोष चौकसे यांच्यासह अनेक नेत्यांनी आकांक्षाच्या घरी जाऊन कुटुंबीयांचे सांत्वन केले. NSUI कडून पीडित कुटुंबाला अडीच लाख रुपयांची तातडीची आर्थिक मदत देण्यात आली असून, किसान क्रेडिट कार्डचे ३ लाख रुपयांचे कर्ज फेडण्याचे आश्वासनही देण्यात आले आहे. विरोधी पक्षनेते उमंग सिंगार यांनीही फोनवरून संवाद साधत कुटुंबाला प्रत्येक संभाव्य मदतीचा शब्द दिला आहे.