पुणे इंटरनॅशनल विमानतळ अवघ्या एका तासाच्या पावसात जलमय; प्रवाशांचे हाल

शहरात अवघ्या एका तासात झालेल्या मुसळधार पावसामुळे पुणे इंटरनॅशनल विमानतळाचे सर्व गेट जलमय झाले असून प्रवाशांना मोठ्या अडचणींचा सामना करावा लागत आहे. सोमवारी संध्याकाळी सुमारे 9.45 वाजेपर्यंत लोहगाव परिसरात 39.8 मिमी पावसाची नोंद झाली, ज्यामुळे विमानतळाच्या निर्गमन द्वाराजवळ चेंबर पूर्णतः पाण्याने भरलेले पाहायला मिळाले.

सोशल मीडियावरून समोर आलेल्या व्हिडिओंमध्ये, केवळ एका तासाच्या पावसामुळे पुणे विमानतळाच्या परिसरात साचलेल्या पाण्याचे विदारक दृश्य पाहायला मिळत आहे. यावरून अंदाज लावता येतो की, आगामी मान्सून काळात स्थिती किती गंभीर होऊ शकते.

हवामान खात्याचा इशारा

भारतीय हवामान खात्याने पुढील काही दिवसांसाठी पुण्यासह महाराष्ट्रातील अनेक भागांमध्ये मेघगर्जनेसह जोरदार पावसाचा इशारा दिला आहे. हवामान खात्याच्या माहितीनुसार, 20 मे रोजी पुणे आणि परिसरात जोरदार पाऊस होण्याची शक्यता आहे, तर 21 ते 25 मे दरम्यान दुपारनंतर आणि सायंकाळी हलक्या ते मध्यम स्वरूपाच्या सरी कोसळणार आहेत.

राज्यात ऑरेंज आणि रेड अलर्ट

राज्यभर 19 ते 25 मे दरम्यान जोरदार पावसाचा अलर्ट देण्यात आला असून कोकण आणि मध्य महाराष्ट्रात मुसळधार पावसाची शक्यता वर्तवण्यात आली आहे. हवामान विभागाने पुणे, नाशिक, अहिल्यानगर, कोल्हापूर आणि सातारा जिल्ह्यांसाठी ऑरेंज अलर्ट दिला आहे.

रत्नागिरीमध्ये अतिवृष्टीसह वीज कोसळण्याची शक्यता आहे. मुंबईसाठी येलो अलर्ट आणि अहमदनगर, सोलापूर, उस्मानाबाद जिल्ह्यांसाठी रेड अलर्ट जारी करण्यात आला आहे.

प्रवाशांसाठी सूचना

पुणे विमानतळावर जाणाऱ्या नागरिकांनी पावसामुळे होणाऱ्या संभाव्य अडथळ्यांची नोंद घ्यावी आणि शक्य असल्यास पर्यायी मार्गांचा विचार करावा. तसेच, हवामान खात्याच्या सूचनांचे पालन करणेही अत्यंत गरजेचे आहे.