अमेरिकन आयोगाची भारतावर निर्बंधांची शिफारस: आरएसएस आणि रॉ निशाण्यावर

नवी दिल्ली

युनायटेड स्टेट्स कमिशन ऑन इंटरनॅशनल रिलिजियस फ्रीडम (USCIRF) ने २०२५ च्या आपल्या ताज्या अहवालात भारताबाबत अत्यंत टोकाची भूमिका घेतली आहे. भारतातील धार्मिक स्वातंत्र्याच्या कथित उल्लंघनाचे कारण देत, आयोगाने 'राष्ट्रीय स्वयंसेवक संघ' (RSS) आणि भारताची गुप्तचर संस्था 'रिसर्च अँड अनालिसिस विंग' (R&AW) यांच्यावर निर्बंध लादण्याची शिफारस केली आहे. या संस्थांशी संबंधित व्यक्तींची मालमत्ता गोठवणे आणि त्यांना अमेरिकेत प्रवेश बंदी करणे, अशा स्वरूपाचे हे निर्बंध असावेत असे अहवालात म्हटले आहे.

आयोगाने अमेरिकन प्रशासनाकडे मागणी केली आहे की, आंतरराष्ट्रीय धार्मिक स्वातंत्र्य कायद्यानुसार भारताला 'विशेष चिंता असलेला देश' (CPC) म्हणून घोषित करावे. अहवालानुसार, २०२५ मध्ये भारतातील धार्मिक अल्पसंख्याकांची स्थिती खालावली असून, धर्मांतरविरोधी कायदे कडक करणे आणि प्रार्थनास्थळांना लक्ष्य करण्याच्या घटनांमध्ये वाढ झाली आहे. तसेच, पहलगाम दहशतवादी हल्ल्यानंतर वाढलेली मुस्लिम विरोधी भावना आणि उत्तर प्रदेश, कर्नाटकातील काही विशिष्ट हिंसक घटनांचा दाखलाही या अहवालात देण्यात आला आहे. ट्रम्प प्रशासनाने भारतासोबतचा व्यापार आणि मदत ही धार्मिक स्वातंत्र्यातील सुधारणांशी जोडावी, अशी आग्रही शिफारस या आयोगाने केली आहे.